ပိုၼ်းဝတ်ႉသၢမ်သၼ်

ႁူင်းသွၼ်ထမ်းပရိယတ်ႉတိ ဝတ်ႉသၢမ်သၼ်ၼႆႉ ၵေႃႇတင်ႈပူၵ်းသဝ်းဝႆႉယူႇတီႈၼႂ်းထုင်ႉသၼ်လွႆၵုၼ်ပွၼ် တူင်ႇဝဵင်းပၢင်လူင် ၸႄႈတွၼ်ႈလွႆလႅမ် မိူင်းတႆး(ပွတ်းၸၢၼ်း)ၼၼ်ႉသေ ပဵၼ်ဝတ်ႉဢၼ်တႄႇတင်ႈၵၢၼ်သွၼ်ႁဵၼ်းပရိယတ်ႉတိ ၸွမ်းထုင်ႉသၼ်လွႆဢွၼ်တၢင်းသုတ်းယဝ်ႉ။

ဝတ်ႉသၢမ်သၼ်လင်မၢႆၼိုင်ႈ တႄႇတင်ႈဝႆႉမိူဝ်ႈပီၵေႃးၸႃႇ 1292 လိူၼ်သီႇမႂ်ႇ 13 ၶမ်ႈ (မႅၼ်ႈပီၶရိတ်ႉ 1931 လိူၼ်ၾႅပ်ႉပရူႇရီႇ 28 ဝၼ်း)သေ သမ်ႉမႄးပူၵ်းတင်ႈလင်ထူၼ်ႈသွင် မိူဝ်ႈပီၵေႃးၸႃႇ 1333 (ပီၶရိတ်ႉမွၵ်ႈ 1971)ၼၼ်ႉယဝ်ႉ။

ထိုင်မႃးပီၵေႃးၸႃႇ 1372 လိူၼ်ၵမ် (ပီၶရိတ်ႉမွၵ်ႈငဝ်ႈပီ 2011)ၼၼ်ႉ သြႃႇလႄႈတၵႃႇလႆႈၸႂ်ၽွမ်ႉၵၼ်ယႃႉၵျွင်းၵဝ်ႇလင်မၢႆသွင်သေ ၵေႃႇသၢင်ႈၵျွင်းလူင်လင်မႂ်ႇ လင်ထူၼ်ႈသၢမ် ပဵၼ်မႃးၵျွင်းဢုတ်ႇသွင်ၸၼ်ႉ ယႂ်ႇၵႂၢင်ႈၼႅၼ်ႈၼႃၶႅမ်ႉလႅပ်ႈႁၢင်ႈလီတႄႉတႄႉ။

ၽိုၼ်ဢိင်တႃႇသိုပ်ႇလူ

“ပိုၼ်းၵႅပ်ႈဝတ်ႉသၢမ်သၼ် တူင်ႇဝဵင်းပၢင်လူင်” ဢၼ်ၸဝ်ႈသုဝၼ်ႇၼ ဝတ်ႉသၢမ်သၼ် တႅမ်ႈသႂ်ႇဝႆႉၼႂ်းပပ်ႉမၢႆၵိုမ်းပွႆးယွင်ႈၵုင်ႇယေႃးမုၼ်ၸဝ်ႈလႆႈၸုမ်ႈၶူးၼွၵ်ႈမိူင်း ဢိတ်ႇဢွၵ်ႇမိူဝ်ႈပီ 2015။
ပိုၼ်းၵႅပ်ႈဝတ်ႉသၢမ်သၼ် လႄႈ ပိုၼ်းၵႅပ်ႈသြႃႇၸဝ်ႈသေႃးၽၼ ဝတ်ႉသၢမ်သၼ် ႁူမ်ႈတင်းၶႅပ်းႁၢင်ႈၸဝ်ႈသြႃႇလႄႈၶႅပ်းႁၢင်ႈဝတ်ႉသၢမ်သၼ် ဢၼ်ၸဝ်ႈၶူးသေႃးရိယ ဝတ်ႉသၢမ်သၼ်တႅမ်ႈသေ ၸဝ််ႈၶူးၶေႇမိၼ်ႇသိုပ်ႇသူင်ႇပၼ်မႃး မိူဝ်ႈ June 2020။