ဝတ်ႉလူင်သၼဵၼ်းၼႆႉ မီးဝႆႉၼႂ်းဢိူင်ႇသၼဵၼ်း တူင်ႇဝဵင်းပၢင်လူင် ၸေႈတွၼ်ႈလွႆလႅမ်သေ ပဵၼ်ဝတ်ႉမီးပိုၼ်းၵဝ်ႇၵႄႇဝတ်ႉၼိုင်ႈ ၼႂ်းထုင်ႉသၼ်လွႆၵုၼ်ပွၼ်၊ တီႈၵေႃႇတင်ႈဝတ်ႉၵေႃႈ သမ်ႉပေႃးမီးမႃးပဵၼ်သၢမ်တီႈယဝ်ႉ။
တီႈၵျွင်းၵဝ်ႇဝတ်ႉသၼဵၼ်း မၢႆၼိုင်ႈ မီးၼႂ်းဝၢၼ်ႈၵျွင်း (ဝၢၼ်ႈႁွင်ႇ) ပွၵ်ႉဝၢၼ်ႈလွႆ တီႈမီးမႆႉႁုင်းလူင် တင်းယႂ်ႇငဝ်ႈမၼ်း မီး 38 ထတ်း ပၼ်ႇႁွပ်ႈ။ တီႈဝတ်ႉမၢႆသွင် လုၵ်ႉတီႈဝၢၼ်ႈလွႆသေ ၶၢႆႉဢွၵ်ႇၵႂႃႇႁဵတ်းၵျွင်းတေႃး ဢၼ်မီးတီႈႁူဝ်ဝၢၼ်ႈ တူၵ်းယၢမ်းလဵဝ်သေ ဢွင်ႈတီႈဝတ်ႉမၢႆသၢမ်ၸမ်ႉ ပဵၼ်တီႈဢွင်ႈဝတ်ႉမိူဝ်ႈလဵဝ် ၼႆႉယဝ်ႉ။
ၵျွင်းဢၼ်ႁဵတ်းသၢင်ႈမႃးတီႈဢွင်ႈမိူဝ်ႈလဵဝ်ၼႆႉၵေႃႈ သမ်ႉပေႃးတၼ်းမႄးႁဵတ်းမႂ်ႇပဵၼ်လၢႆပွၵ်ႈယဝ်ႉ။ ၵႃႈၼင်ႇႁူႉထိုင်တႄႉ မိူဝ်ႈပီပုတ်ႉထ 2519 (ပီၶရိတ်ႉ 1976) ၽွင်းၸဝ်ႈသြႃႇၵုင်ႇမႃႇ ပဵၼ်ၸဝ်ႈၵႂၢၼ်းဝတ်ႉၼၼ်ႉ ပေႃႈထဝ်ႈၵၼ်းၸဵတ်း ႁပ်ႉပဵၼ်ႁူဝ်ငဝ်ႈၵမ်ႉထႅမ်ပၸ်ႉၸယႃႇၼုၵ်ႉၵႁသေ ယႃႉလင်ၵဝ်ႇ ႁဵတ်းလင်မႂ်ႇ ယႂ်ႇလိူဝ်လင်ၵဝ်ႇ ပဵၼ်မႃးၵျွင်းလူင်ၶိုၵ်ႉၶမ်ႇၼႅၼ်ႈၼႃ မႆႉသဝ်မၼ်းၵေႃႈ လႅမ်ႈယႂ်ႇလႅမ်ႈလူင် မၢင်လႅမ်ႈ ၵွတ်ႇပေႃးဢမ်ႇၶႆႈႁွပ်ႈ သမ်ႉပေႃးၵိုင်ႇႁွင်ႉၸိုဝ်ႈဝႃႈ ၵျွင်းလူင်သၼဵၼ်း ၼႆယူႇတႄႉယဝ်ႉ။ လွင်ႈလၢၵ်ႇလၢႆးၵျွင်းသၼဵၼ်းလင်ၼႆႉဢၼ်ၼိုင်ႈတႄႉ ၸၼ်ႉတႂ်ႈၵျွင်းလူင်ၼၼ်ႉ ဢဝ်လိၼ်ဢုတ်ႇၵေႃႇႁွပ်ႈဝႆႉသေ သမ်ႉဢဝ်လိၼ်ထႅမ်သတ်ႉသႂ်ႇၼႂ်းမၼ်းတၼ်ပိၵ်းဝႆႉၼၼ်ႉယဝ်ႉ။ ဢၼ်လီသေလၢႆၸွမ်းတႄႉ ၵျွင်းလူင်သၼဵၼ်းလင်ၼႆႉ တၼ်းယူႇထူၼ်ႈလႆႈ 37 ပီၵူၺ်း။
ထိုင်မႃးၼႂ်းပီ 2013 ၼၼ်ႉ ယွၼ်ႉလၢႆလွင်ႈလၢႆတၢင်းသေ သြႃႇလႄႈတၵႃႇတင်းလၢႆ လႆႈၸႂ်ၽွမ်ႉၵၼ်ယႃႉပႅတ်ႈၵျွင်းလူင်လင်ၵဝ်ႇ ၶိုၼ်းႁဵတ်းလင်မႂ်ႇ ယႂ်ႇၶႅမ်ႉလိူဝ်လင်ၵဝ်ႇထႅင်ႈ၊ ပဵၼ်မႃးၵျွင်းၵင်ႈၽႃဢုတ်ႇသွင်ၸၼ်ႉ၊ ၸၼ်ႉတႂ်ႈမၼ်းၵေႃႈၵႂၢင်ႈၵူင် ဢမ်ႇတၼ်မိူၼ်ၼင်ႇလင်ၵဝ်ႇၼၼ်ႉယဝ်ႉ။
သဵၼ်ႈမၢႆၸဝ်ႈၼင်ႈၵျွင်းၵႂၢၼ်းဝတ်ႉၸမ်ႉ
- ၸဝ်ႈသြႃႇၵၵ်း (လုၵ်ႉဝၢၼ်ႈယိူင်းမႃး)
- ၸဝ်ႈသြႃႇဢိၼ်ႇတႃႇ
- ၸဝ်ႈသြႃႇဝႃႇရ
- ၸဝ်ႈသြႃႇၵုင်ႇမႃႇ
- ၸဝ်ႈသြႃႇၼၼ်ႇတထၸ
- ၸဝ်ႈသြႃႇၸတိလ
လႆႈႁူႉဝႃႈ ၶဝ်ၸဝ်ႈတင်းႁူၵ်းတူၼ်ၼႆႉ ပဵၼ်ၸဝ်ႈၼင်ႈၵျွင်းတီႈမိူဝ်ႈလဵဝ်(တီႈမၢႆသၢမ်) ၼႆႉၵူၺ်း ၼႆယဝ်ႉ။ ၵျွင်းၵဝ်ႇ တီႈမၢႆၼိုင်ႈလႄႈမၢႆသွင်ၼၼ်ႉ ဢမ်ႇလႆႈႁူႉထိုင်ၸိုဝ်ႈၸဝ်ႈၼင်ႈၵျွင်းမၼ်း။
ၼႂ်းပၢၼ်ၸဝ်ႈသြႃႇၸတိလမိူဝ်ႈလဵဝ်ၼႆႉ လႆႈႁၼ်လွင်ႈၵေႃႇသၢင်ႈဝတ်ႉဝႃးၶိုၼ်ႈယႂ်ႇႁိူဝ်ႈႁိူင်းပိူင်းသႂ်ဝႆႉယူႇတႄႉတႄႉ။
ၽိုၼ်ဢိင်တႃႇသိုပ်ႇလူဢၢၼ်ႇ
ပိုၼ်းၵႅပ်ႈဝတ်ႉသၼဵၼ်း ဢၼ်ၸဝ်ႈထမ်ႇမဝရ (ဝတ်ႉသၼဵၼ်း)တႅမ်ႈဝႆႉ ၼႂ်းပပ်ႉမၢႆၵိုမ်းပွႆးယွင်ႈၵုင်ႇယေႃးမုၼ် ၸဝ်ႈလႆႈၸုမ်ႈၶူးၼွၵ်ႈမိူင်း (2015)၊ ၼႃႈလိၵ်ႈ 67−68။
ၽူႈသူင်ႇပၼ်ၶႅပ်းႁၢင်ႈ
ၸဝ်ႈၶေႇမိၼ်ႇတ (ဝတ်ႉပၢင်ႁူႈ)
05/06/2020 (လိူၼ်ၸဵတ်းမူၼ်း)
ႁၵ်ႉမႅတ်ႈတႃႇ 